Guðmundur Stefánsson

Ný síða á vísi.is

Tue, 14 Feb 2012 10:43:13 GMT

Þar sem BlogCentral ætlar að hætta að halda úti bloggþjónustu, hef ég stofnað nýja síðu:

http://blogg.visir.is/gummiste/

Var að hugsa um að hætta með bloggið þar sem manni er ekki eins mikið niðri fyrir eins og þegar maður var yngri, en niðurstaðan er að halda úti síðu enn um sinn.
Ég hef ekki prófað fésbókina enn, en kannske endar maður þar einhvern tíma.
Þakka innlit og umsagnir á þessari síðu á umliðnum árum.

Sérstök vísa

Sun, 22 Jan 2012 13:54:26 GMT

Þessi vísa kom á Leir og er gömul og höfundarlaus eftir því sem best er vitað.
Það hefur vafist fyrir sumum að lesa úr henni.

        N vil ég kaupa af þér H,
        S líka er vakurt C,
        Q vel þrifna og þar með Á,
        Þ í hringju látna í T.

Sjávarstaða í framtíð

Sun, 22 Jan 2012 13:16:59 GMT

Ég heyrði ekki betur en að það væri tvítekið í útvarpinu í gærmorgun að með áframhaldandi hlýnum myndi allir jöklar heimsins bráðna og sjávaryfirborð hækka um 70 metra eftir 300 ár.

Ef það er rétt þá þetta:

        Bráðni og étist upp jöklabreið,
        jarðnæðið verður að hafi,
        brimskaflar æðandi upp á Skeið
        og Urriðafossinn á kafi.
                                    GSt.

skynsemi.is

Sun, 22 Jan 2012 13:06:33 GMT

Þeir sem vilja skora á Alþingi að leggja til hliðar aðildarumsóknina að ESB geta gert það á skynsemi .is
það má opna með því að klikka á það hér fyrir neðan:

http://skynsemi.is/

Hvað má éta ?

Sat, 21 Jan 2012 13:25:56 GMT

        Allir höfðu áður fyr
        á eftirliti trúna.
        Hvumsa orðinn, hver einn spyr:
        Hvað má éta núna ?
                        GSt.

Nýsköpun og gömul

Sun, 15 Jan 2012 12:16:42 GMT

Löngum þótti sköpun Drottins viðunandi verk
og valið hafð’ann efni gott í líkamsparta alla.
Tugþúsundir ára liðu, -lýðinn greip þá sterk
löngun til að breyta um og sníð’af helstu galla.

Lengi haf’í Frankaríki flinkir búið menn
en fatatísku kvennanna þeir hafa síst í skorðum.
Taldi einn að laga mætti líkamsparta enn
og ljúka þessu verkefni sem Drottinn sá um forðum.

Hrífa mætti kjána þá sem karlpeningur er
konurnar ef tískufötin pössuðu í betur.
Ráðið helsta var að stækka brjóstin oft svo ber,
-beita, sem að virkað oft á karlmennina getur.

Nýja dótið reyndist vera lélegt bæð’og lekt
sem læknar urðu að fjarlægja með tilheyrandi sárum
Nú verður þess’í Frakklandi að svara fyrir sekt
og sitja má í tugthúsin’á allra næstu árum.

Þótt stundum við í gamla skrokkinn voða fáum verk
og verði hált á svellinu og leggir sundur brotni,
í líkamanum okkar virðist steypan nokkuð sterk
og staðist hefur sköpun þessi tímans raun hjá Drottni.

GSt.

Er minnkar hvötin

Sat, 14 Jan 2012 16:06:51 GMT

Í tilefni af afmæli eins Leirfélagans fóru af stað yrkingar um aldur og kynhvöt.
Þá varð þessi vísa til hjá mér:

Er minnkar hvötin, má þess njóta
og meiri hafa frið.
Sá mun líka síður brjóta
sjötta boðorðið.
GSt.

Björt framtíð

Tue, 10 Jan 2012 10:32:40 GMT

    Í tilefni af flokksstofnun Guðmundar Steingrímssonar:

    Örva vill Guðmundur glaðari lýð.
    Gálaust er þessu að hafna:
    Búsældarkjörum og batnandi tíð
    og bjartari framtíð með nafna.
            GSt.

Friðun hungraðra dýra

Tue, 03 Jan 2012 21:16:01 GMT

Nú er uppi tillaga um að banna veiðar á nokkrum fuglategundum af svartbakskyni, af því að þeir hafa ekki nóg æti, þar sem sandsílastofninn er í lægð. Samkvæmt tillögunni þykir víst betra fyrir fuglana að verða hungurmorða en að verða veiddir.

Álfheiður Ingadóttir alþingismaður kom í Kastljós hér um árið og vildi að ísbirnir sem hér gengju á land yrðu fangaðir og fluttir í búrum á sínar heimaslóðir, því þeir væru þar í útrýmingarhættu. Sú útrýmingarhætta stafar af hlýnun og fæðuskorti þar.

Öfugt við þetta kveða lög um búfjárhald og fóðurforða á um það að bóndi skuli fækka fé sínu hafi hann ekki nægt fóður.

Hér rekur sig eitt á annars horn (eins og graðpening hendir vorn).

Ég held að gott væri að fækka dýrum í stofnum sem ekki hafa næga fæðu, rétt eins og búfé sem hefur ekki næga beit eða fóður. Hin dýrin hafa það þá bara betra og það léttir á fæðugjafanum, hvort sem um er að ræða gróður eða önnur dýr í fæðukeðjunni.

Kjarnorkuvopn

Wed, 21 Dec 2011 10:46:00 GMT

Nú þegar nýr maður kemur í æðsta valdastólinn í N-Kóreu, hafa menn eðlilega áhyggjur af kjarnorkuvopnaeign þar í landi. Það er líka áhyggjuefni ef Íranar koma sér upp kjarnorkuvopnum.
það eru einkum þau kjarnorkuveldi sem fyrir eru sem beita þrýstingi til þess að koma í veg fyrir að fleiri ríki eignist kjarnorkuvopn, en ekki bjóðast þau til þess að draga jafnframt úr sinni kjarnorkuvopnaeign.
Önnur hlutlaus ríki þyrftu að beita sér meira gangvart öllum kjarnorkuvopnum, bæði hjá gömlu kjarnorkuveldunum og þeim nýju.
Stefna þarf að eyðingu allra kjarnorkuvopna í heiminum. Nóg er af vígtólum samt.

Frost og logn

Sat, 17 Dec 2011 21:18:36 GMT

Það er kaldur punktur hér í Hraungerði í stillum og í hægum norðan blæ að vetri.
Þá tekur maður mið af áætluðu frosti á Hveravöllum á spákortinu en dregur svona 2-3 gráður frá.
Í síðustu viku komst frostið hér í -19°C.
Það munar stundum 4-5 gráðum hvað það er kaldara hér en á Selfossi.
Það er líklega eitthvert loftflæði ofan af hálendinu sem liggur hér um við þessar kringumstæður.
Þetta er þurrt loft og í svona logni eða hægum blæ finnst ekki mikið fyrir kuldanum.

Hringnum lokað

Sun, 24 Jul 2011 16:15:44 GMT

Í Eiríkssögu rauða og Grænlendingasögu er sagt frá einum af merkustu atburðum mannkynssögunnar. Það er þegar norrænir menn hittu frumbyggja Ameríku í fyrsta sinn.

Mannkynið er upprunnið í Afríku. Þaðan breiddist það út, fyrst norður um Litlu-Asíu en síðan dreifðist það í báðar áttir, vestur til Evrópu og austur til Asíu.

Þeir sem til austurs fóru um Asíu komust alla leið austur á Tjúktaskaga við Beringssundið, þar sem ekki eru nema rúmir 100 km. yfir til Ameríku. Það er eins og Faxaflói milli Reykjaness og Snæfellsness, svo auðvelt hefur verið að komast þar yfir á trjábolum eða flekum. Reyndar er talið að í fyrndinni hafi Asía og Ameríka verið samfastar með landbrú þar sem nú er Beringssund, svo hugsanlega hafa fyrstu menn farið þar yfir þurrum fótum. Það er líka hugsanlegt að það hafi verið farið yfir á ís.

Þeir sem fóru til vesturs komust að vesturströnd Evrópu og um Ermasund, sem er einungis um 35 km. breitt, til Bretlandseyja. Það er heldur styttra en yfir Húnaflóa, frá Kaldbaksvík á Ströndum yfir á Skagaströnd. Til Norðurlanda hefur mannfólkið svo farið um dönsku eyjarnar og sundin. Elstu mannvistarleifar í Svíþjóð eru um 8 þúsund ára gamlar. Langann sjóveg gat fólk ekki farið að sinni.. Það beið í einhverjar árþúsundir. Á 7.og 8. öld e.kr. hefur skipasmíðakunnáttu fleygt svo fram að hægt er að fara lengra út á hafið. Með smíði víkingaskipa norrænna manna er tekið stökk fram á við í skipasmíði og þeir ná yfirburðum á höfunum þar í kring og finna og nema Ísland á 9.öld. Á 10.öld finna þeir og nema Grænland og í framhaldi af því finna þeir Ameríku og hitta þar svokallaða skrælingja,frumbyggja Ameríku,

Þar með var hringnum lokað. Þar hittust annars vegar þeir sem fóru í austur frá Litlu-Asíu forðum og hins vegar þeir sem fóru í vestur.

Þá hafði mannkynið hafði lokið við að leggja undir sig heiminn.

Velkomin rigning

Sun, 24 Jul 2011 15:58:03 GMT

Velkomin rigning! Vertu hér í nótt.
Vinsælir dropar falla milt og rótt.
Hríslast um hár og andlit atlot þín.
Ertu nú loksins komin góða mín?

Svona er upphaf kvæðis Guðmundar Inga um rigninguna.

Nú er fyrsta rigningin í langan tíma sem gegnbleytir moldina.
Kartöflugarðar hafa litið út eins og í byrjun júní og flög hafa rétt náð að grænka en vonandi verður nú breyting á.

Kerruhestar nútímans

Sun, 03 Jul 2011 14:15:56 GMT

Þetta fór á Leir í framhaldi af yrkingum um hesta og hestamannamót:

Mér finnst umferð ríðandi fólks hafa farið minnkandi hér í kringum mig en umferð bíla með hestakerrur í eftirdragi margfaldast.

Úr fola má oft góðhest gera.
Glíma við hann marga snerru.
Fyrir mestu finnst mér vera
að fari hann vel í hestakerru.
GSt.

ps. Hlutverk kerruhesta eða vagnhesta hefur snúist við. Áður drógu þeir kerrur og vagna en nú eru þeir orðnir farþegar.

Friðhelgi náttúrunnar

Sun, 03 Jul 2011 13:45:23 GMT

Í pistli sínum á Eyjunni fjallar Illugi Jökulsson um þá tillögu að setja inn í nýju stjórnarskrána ákvæði um að öll náttúra Íslands sé friðhelg.

Ég setti eftirfarandi í umsagnardálk hjá honum:

Stjórnarskrá vil ég umfram allt hafa einfalda og skýra.
Mér finnst ekki við hæfi að hún í öðru orðinu kveði á um friðhelgi náttúrunnar en í hinu að gagnvart flestu mannanna bjástri verði gefin undanþága.
Munu lög um lax- og silungsveiði þá hefjast á því að þrátt fyrir friðhelgi lax og silungs sé heimilt að veiða þá?
Munu skipulagslög hefjast á því að þrátt fyrir friðhelgi alls lands sé heimilt að gera á því hitt og þetta?
Munu lög um stjórn fiskveiða hefjast á því að þrátt fyrir að fiskistofnar á Íslandsmiðum séu friðhelgir þá sé heimilt að veiða úr þeim?
Mun ekki runa af lögum fjalla um undanþágur og afslætti af friðhelgi náttúrunnar?
Er þá ekki ákvæðið um friðhelgi náttúrunnar í stjórnarskrá orðin marklaust?
Einstaka umdeilda nýtingu á náttúrunni á að útkljá á grunni skipulagslaga og náttúruverndarlaga og reglugerða og nýrra lagasetninga ef þörf krefur.
Mér finnst náttúrunni og okkur farnast nokkuð vel í sambúðinni og sé ekki þá vá sem kallar á að þessi afdráttarlausa friðhelgi allrar náttúru sé sett í stjórnarskrá, sem allir sjá að ekki verður hægt að standa við.
Mesta náttúruváin sem að okkur steðjar er hlýnun jarðar, sem stafar mest af olíunotkun jarðarbúa.
Ein og ein malarnáma eða eitt og eitt vatnslón hefur ekki viðlíka háska í för með sér.
Í stjórnarskrá væri nær að setja bann við olíuleit og -vinnslu bæði á Drekasvæði og annars staðar við Ísland, já eða bara bann við olíunotkun á Íslandi.